RUPERTIVILLA

RUPERTIVILLA

vulgo RAPPERSWILL, oppid. Helvetiae; inter utrumque lacum superiorem et inferiorem Tigurinum, in prominente cornu, ad instar peninsulae conditum, locô amoenô, formâque eleganti, 20. fere mill. pass. supra Tigurum. Dictum est a quodam Ruperto, militiae sub Ludovico Rege duce, qui, amoenitate loci captus, arcem ibi condidit, teste Guillimannô. Fuit olim Comitum cognominum sedes, quorum successores Habspurgii deinde ibi praetuerunt. In Helvetiorum potestatem pervenit A. C. 1456. ab Uriis, Suitiis, Underwaldiis et Glaronensibus, bellô cum Constantiensibus finitô occupatum, quibus etiamnum subest, servatâ tamen civibus, quam sub Austriis habebant, libertate. Loci antiquitatem arguere videtur tum eius opportunitas, tum lapis in arae speciem formatus, qui nunc Ionae in proximo vico ostenditur, pone templi ostium, cum paucis his literis. C. OCT. PROVIN. S. L. D. D. D. Vide Simler. de Rep. Helv. Io. Bapt. Plantin. Helv. Not. antiq. etc. VIRI PRINCIPES, EX FAMILIA PALATINA.